అందరికీ గురు పూర్ణిమ శుభాకాంక్షలు.
నేను మీకు ఇదివరకు ఎన్నోసార్లు చెప్పినట్లుగా, నిజమైన గురువు మిమ్మల్ని తన కన్నా ఎక్కువగా ప్రేమిస్తారు. తనకన్నా మీరు మరిన్ని ఉన్నత శిఖరాలు చేరుకోవాలని ఆయన అభిలషిస్తారు. ఈ క్రమంలో ఇది మనకెన్నో విషయాలు విశదీకరిస్తుంది. గురువర్యుల మానసిక, హృదయాంతరాల లోతులను, ఉన్నత స్థితులను అలాగే మనపై వారు పని చేసే విధానాన్ని మీరు ఎలా అర్థం చేసుకోగలుగుతారు?
ఈ పరిజ్ఞానం లేదా ఇటువంటి ఎరుక మనకు లేనప్పుడు, వారికి పూర్తిగా శరణాగతులవటమే మనం చేయవలసింది. ఇటువంటి ఆధ్యాత్మిక ప్రయాణంలో అసంపూర్ణ విధానాలు మేలు చేయవు.
వారెప్పుడూ వారి దగ్గర ఉన్న దానికన్నా ఎక్కువే ఇవ్వాలనుకుంటారు. ‘నా ప్రియ శిష్యునికి ఇంకా నేనేమి ఇవ్వగలను?’ అని వారు ఎప్పుడూ ఆవేదన చెందుతారు. మన అందరి కోసం వారు పడే వేదన అలా ఉంటుంది. కాబట్టి మనల్ని మనం సిద్ధం చేసుకుందాం!
నేను ఇప్పటివరకూ చూసిన దాని ప్రకారం, మన వైపు నుంచి ఏమైనా అవసరమైనది అంటూ ఉంటే, అది మనం మధ్యలో జోక్యం చేసుకోకపోవడమే! తెరచిన హృదయంతో మనం ఉండాలి. ఏమాత్రం చెదరకుండా ఉండగలగాలి. అయితే మన జోక్యం అన్ని విషయాలలో అధికంగానే ఉంటుంది.
అందువల్ల ఆధ్యాత్మిక బీజం ఏదైతే మొలకెత్తవలసి ఉంటుందో అది మొలకెత్తదు. మన కారణంగానే జరగవలసినది జరగదు. ప్రాణాహుతి, కృప అంతా నిండి ఉందని చెప్తారు కదా!
తెరచిన హృదయానికే కదా అంతా లభించేది!
హృదయం యొక్క లక్షణం ఏమిటి – గ్రహించడం…
బృహదారణ్యకోపనిషత్తు లో – సంస్కృతం లో ఉన్న విషయం మీకు చెప్పాను కదా…
హృదయం యొక్క నిర్వచనం ఇచ్చారు…
హృ – ద – య…
హృ – అంటే, ఆకర్షించడం…
ద – అంటే, తిరిగి ఇవ్వడం… ఇచ్చిపుచ్చుకోవడం… నేను తీసుకుంటాను, తిరిగి అందరికీ ఇస్తాను, పంచుతాను..
అప్పుడే అది వృద్ధి చెందుతుంది…
అప్పుడే మనకు ఉన్నత స్థితులతో సంబంధం ఏర్పడగలదు…
ఈ ఇచ్చిపుచ్చుకోవడం లోనే మనకు ఉన్నత స్థితులతో సంబంధం ఏర్పడుతుంది. మీరే చేసి చూడండి!
మన కర్తవ్య పాలన – మనం ఏ పని చేసినప్పటికీ – అంకితభావంతో నిజాయితీగా, నిబద్ధతతో చేయాలి. అలాగే మన చేతిలో లేని వాటి గురించి మన భయాల బరువులను తగ్గించుకోగలగాలి. ఈ విధంగా మనల్ని మనం నిరంతరం మెరుగుపరచుకోవడం ద్వారా, అనవసరపు ఆలోచనలు, భయాలను మనం అధిగమించవచ్చు. ‘దృష్టి ఎటువైపు ఉంటే శక్తి అటువైపే ప్రవహిస్తుంది’ అన్న సామెత ప్రకారం, అంకితభావంతో మన సామర్థ్యం మేరకు పని చేసినప్పుడు మనలో చక్కటి తృప్తి ఏర్పడుతుంది. మన పరిస్థితులను యధాతధంగా స్వీకరించడం ద్వారా నిరంతర ప్రయత్నంతో చేసే కృషి, మనలో సంతృప్తికరమైన స్థితిని కలగజేస్తుంది. ఈ బీజం పెరిగి మహావృక్షమై చివరకు అంతులేని ఆనందాన్ని, తద్వారా మన హృదయంలో పరమ శాంతిని, సంతోషాన్ని కలుగజేస్తుంది. ఈ విధానాన్ని మరింత వేగవంతం చేయడానికి, హృదయ స్వచ్ఛతకు, మనలోని సంక్లిష్టతలను, మాలిన్యాలను వదిలించుకోవడం ఎంతో ముఖ్యం.
హార్ట్ ఫుల్ నెస్ విధానంలోని సాయంకాలపు నిర్మలీకరణ లేదా క్లీనింగ్ అనే పద్ధతి మనలోని సంక్లిష్టతలను, మాలిన్యాలను ప్రభావవంతంగా తొలగించి పునరుజ్జీవింప చేసే ప్రక్రియ. మీ హృదయము, మనసు ఎంతో తేలికగా, స్వచ్ఛంగా మారే కొలది ప్రతిదీ సరళంగా, ఆహ్లాదకరంగా తయారవుతుంది. ఆత్మవిశ్వాసం అంటే, స్వచ్ఛమైన ఉనికి యొక్క అత్యున్నత ఫలితమే.